Content navigation
Scolas autas spezialisadas
Ultra da las scolas autas universitaras ha la Svizra anc in segund tip da scola auta, las scolas autas spezialisadas. Las scolas autas spezialisadas porschan scolaziuns orientadas a la pratica ed a l'applicaziun cun diploms che cuntegnan qualificaziuns professiunalas. Tar lur purschida tutgan studis da bachelor e da master orientads a la pratica en differents champs sco er ina vasta paletta da furmaziuns supplementaras. I dat nov scolas autas spezialisadas regiunalas da dretg public ed ina scola auta spezialisada privata.
Las scolas autas spezialisadas porschan l'access ad in studi d'ina scola auta en spezial a glieud da professiun che ha fatg ina furmaziun fundamentala professiunala e ina maturitad professiunala sco er ad absolventas ed absolvents d'ina maturitad spezialisada.
L'incarica da prestaziun da las scolas autas spezialisadas cumpiglia la teoria (scolaziun e furmaziun supplementara), la perscrutaziun ed il svilup orientads a l'applicaziun, il servetsch a favur da terzas persunas sco er la collavuraziun cun las scolas autas e cun ils instituts da perscrutaziun en Svizra ed a l'exteriur. Pervia da lur scolaziuns orientadas a la pratica e pervia da lur perscrutaziun orientada al champ professiunal tutgan las scolas autas da pedagogia (SAP) tar il tip da scola auta «scola auta spezialisada».
Studi da bachelor
-
Las cundiziuns d'admissiun al studi da bachelor èn regladas en la Lescha federala davart l'agid a las scolas autas e davart la coordinaziun en il sectur da las scolas autas svizras (LASA) ed en l'Ordinaziun davart l'admissiun a studis da scola auta spezialisada.
-
L'admissiun senza examen ad in studi d'ina scola auta spezialisada sin il nivel da bachelor premetta ina maturitad professiunala en cumbinaziun cun ina furmaziun fundamentala professiunala en ina professiun ch'è parentada cun la direcziun da studi. Sche la furmaziun fundamentala professiunala n'è betg vegnida fatga en ina professiun parentada, vegn pretendida supplementarmain in'experientscha d'almain 1 onn en il mund da lavur.
-
Titularas e titulars d'in attestat da maturitad gimnasiala vegnan admess senza examen, sch'els cumprovan d'avair in'experientscha d'almain 1 onn en il mund da lavur sin in champ professiunal ch'è parentà cun la direcziun da studi.
-
Il diplom d'ina scola media spezialisada cun ina maturitad spezialisada supplementara permetta da cumenzar cun tschertas scolaziuns da scola auta spezialisada, en spezial scolaziuns dal sectur da sanadad, da lavur sociala, da communicaziun ed infurmaziun, da furmaziun ed art, da musica e teater sco er da psicologia applitgada.
-
Absolventas ed absolvents cun auters diploms dal stgalim secundar II pon er vegnir admess a scolas autas spezialisadas, sch'els adempleschan cundiziuns supplementaras (experientscha en il mund da lavur e/u examen d'admissiun).
La decisiun definitiva davart l'admissiun ad ina scolaziun è lura chaussa da la scola auta spezialisada respectiva. Differentas direcziuns da scolaziun prevesan ultra da quai scleriments supplementars da la qualificaziun.
-
Studi da master
-
L'admissiun al studi da master premetta in diplom da bachelor en il medem sectur spezial u in diplom universitar equivalent. Las scolas autas spezialisadas pon far pretensiuns supplementaras.
Studi da bachelor e da master
-
La furmaziun ha lieu tenor il model da dus stgalims cun studis da bachelor e da master tenor la Decleraziun da Bologna. Cuntrari a las scolas autas universitaras na porschan las scolas autas spezialisadas nagin studi da doctorat.
Studis da bachelor
Studis da bachelor (180 puncts dad ECTS) qualifitgeschan per regla per ina professiun. Els permettan d'entrar directamain en la pratica professiunala. Il studi a temp cumplain dura 3 onns, in studi cumplementar a la professiun dura per regla 4 onns.Studis da master
Las scolas autas spezialisadas porschan studis da master (90 fin 120 puncts dad ECTS) che sa basan sin il studi da bachelor. Ils studis da master intermedieschan supplementarmain enconuschientschas pli profundas, spezialisadas, che sa basan sin la perscrutaziun, e preparan las studentas ed ils students per in diplom supplementar che cuntegna qualificaziuns professiunalas. Il studi dura 1,5 fin 2 onns. La purschida da studis da master resta limitada, perquai ch'il diplom da bachelor che cuntegna qualificaziuns professiunalas è da princip la regla a las scolas autas spezialisadas.Studis da bachelor e da master vegnan concludids cun titels federals protegids:
-
Bachelor of Arts B A u Bachelor of Science B Sc (emprim stgalim da studi)
-
Master of Arts M A u Master of Science M Sc (segund stgalim da studi)
-
Furmaziun supplementara
-
Las scolas autas spezialisadas han ina vasta purschida da furmaziuns supplementaras. Da la purschida fan part curs da furmaziun supplementara e scolaziuns da furmaziun supplementara. Las scolaziuns da furmaziun supplementara mainan al Master of Advanced Studies (MAS) (en il sectur da l'economia er al Executive Master of Business Administration [EMBA]). Per scolaziuns pli curtas surdattan las scolas autas spezialisadas ils diploms Diploma of Advanced Studies (DAS) e Certificate of Advanced Studies (CAS).
Footer
ides@edk.ch
+41 31 309 51 00
Per incumbensa da la CDEP e dal SEFRI
