Cundiziuns da recepziun

Las cundiziuns d'admissiun dependan dal gener da la furmaziun supplementara. Per la gronda part da las purschidas da furmaziun supplementara na datti naginas cundiziuns d'admissiun spezialas. Cundiziuns d'admissiun spezialas pon valair tar tscherts programs da furmaziun supplementara da scolas autas (Master of Advanced Studies [MAS], Diploma of Advanced Studies [DAS], Certificate of Advanced Studies [CAS]) u da scolas spezialisadas superiuras (studis da diplom supplementar). En quest connex vegn per regla pretendì in diplom da scola auta u ina furmaziun preliminara equivalenta.

Organisaziun da la furmaziun supplementara

La structura dals curs e dals studis, il temp che vegn duvrà, las furmas per cumprovar las prestaziuns e.u.v. èn fitg differents e dependan da la furmaziun supplementara tschernida. Dapi mez dals onns 90 è s'etablida – en il sistem svizzer da furmaziun supplementara – la scolaziun modulara en blers secturs. Moduls èn unitads isoladas che pon vegnir frequentads independentamain in da l'auter u che pon vegnir cumbinads cun auters moduls ad in tschert studi. Il sistem modular è in sistem avert e permeabel.

Clusiun

Il tip da clusiun variescha d'occurrenza da furmaziun supplementara ad occurrenza da furmaziun supplementara. Ils purschiders pon consegnar agens certificats u atgnas confermas da curs che n'èn betg renconuschids dal stadi u dal chantun. A scolas autas pon – ultra da las confermas da curs – er vegnir acquistadas las suandantas clusiuns:

• Master of Advanced Studies (MAS): almain 60 puncts dad ECTS
• Diploma of Advanced Studies (DAS): almain 30 puncts dad ECTS
• Certificate of Advanced Studies (CAS): almain 10 puncts dad ECTS

Studis da diplom supplementars a scolas spezialisadas superiuras serran cun in diplom federal renconuschì. Al tip da furmaziun vegn agiuntada la cumplettaziun SDS SSS (p.ex. controlladra dipl. SDS SSS/controllader dipl. SDS SSS).

In cas spezial èn ils curs preparatorics sin examens federals. Ils curs preparatorics preparan per in diplom terziar da la furmaziun professiunala superiura (examen professiunal cun attestat professiunal federal resp. examen professiunal superiur cun diplom federal). Els èn concepids da moda e maniera differenta e n'èn betg reglamentads dal stadi. Sch'ils curs figureschan sin la glista dals curs preparatorics, pon las absolventas ed ils absolvents dentant obtegnair ina finanziaziun dal subject suenter avair absolvì l'examen federal.

In grond dumber da purschiders porschan furmaziuns supplementaras ordaifer il sectur terziar. Las purschidas tanschan davent da curs da lingua da tut ils nivels sur informatica, artisanadi fin a curs orientads a la professiun u scolaziuns per spezialisaziuns professiunalas u per cuntanscher la cumpetenza da direcziun. Ils purschiders surdattan agens certificats u atgnas confermas da curs che n'èn betg renconuschids dal stadi.

Differents diploms da la furmaziun formala pon er vegnir fatgs posteriuramain (attestat da maturitad gimnasiala, certificat da scola media spezialisada, attestat da maturitad spezialisada, attestat federal da qualificaziun u attestat federal da maturitad professiunala).