Navigation on sistem-da-furmaziun-svizzer

Content navigation

You are here: Home / Furmaziun postobligatorica / Stgalim terziar

Stgalim terziar

Furmaziun professiunala superiura

La furmaziun professiunala superiura fa part dal stgalim terziar. Ella porscha scolaziuns per champs da lavur pretensius e per funcziuns directivas e serva a la scolaziun da cader ed a la spezialisaziun da glieud da professiun.

Tar la furmaziun professiunala superiura tutgan scolaziuns

La furmaziun professiunala superiura è ina particularitad svizra. Sias scolaziuns e ses diploms n'èn betg uschè enconuschents a l'exteriur en pajais senza sistem dual da la furmaziun professiunala, perquai che las scolaziuns correspundentas vegnan absolvidas en blers pajais a scolas autas. Per rinforzar la furmaziun professiunala superiura ha il SEFRI, ensemen cun ils partenaris da la furmaziun professiunala, elavurà denominaziuns englaisas per ils diploms da la furmaziun professiunala superiura.

Scolas autas

Tar l'incarica da prestaziun da las scolas autas tutgan la scolaziun e la furmaziun supplementara, la perscrutaziun ed il svilup sco er la furniziun da servetschs per terzas persunas. La Svizra enconuscha trais tips da scolas autas, las scolas autas da pedagogia tutgan tar las scolas autas spezialisadas:

Scolas autas universitaras

Las scolas autas universitaras èn las scolas autas academicas tradiziunalas. Tar ellas appartegnan las 10 universitads chantunalas e las duas Scolas politecnicas federalas (SPF) che vegnan manadas da la Confederaziun. L'admissiun ha da princip lieu cun in attestat da maturitad gimnasiala. En il center da la scolaziun stat la scienza. In studi da doctorat u in program da studi per PhD po mo vegnir absolvì ad ina scola auta universitara.

Scolas autas spezialisadas

Las scolas autas spezialisadas amplifitgeschan la purschida da las scolas autas cun scolaziuns che s'orienteschan ad ina professiun. Actualmain existan otg scolas autas spezialisadas da dretg public ed ina scola auta spezialisada privata. L'admissiun ha da princip lieu cun in attestat federal da maturitad professiunala, ma pussaivels èn er auters access. Las scolas autas spezialisadas porschan ina scolaziun che sa basa sin la scienza e ch'è orientada a la pratica.

Scolas autas da pedagogia

Las scolas autas da pedagogia èn responsablas per la scolaziun e per la furmaziun supplementara da las persunas d'instrucziun. Ellas appartegnan tipologicamain a las scolas autas spezialisadas, han dentant il mandat specific da porscher la furmaziun per las professiuns da scola. L'access regular ha lieu cun in attestat da maturitad gimnasiala.

Per garantir la permeabilitad datti ultra dals access regulars differentas vias d'access da las scolaziuns dal stgalim secundar II a las scolas autas sco er pussaivladads da midar tranter ils differents tips da scola auta.

Footer